Aumenatge aus nostes autors desapareishuts
La Civada e l’Ostau Bearnés que v’invitan a ua prosejada qui’s debanarà a lor, au 46 Baloard Alsace Lorraine a Pau, lo dimars 14 de març 2017 a comptar de 18h15...
 

La Civada e l’Ostau Bearnés qu’an convienut d’organizar au mensh un còp l’an ua serada entà har aunor a tanhents de l’arrenavida de la lenga e de la cultura nosta qui ns’an deishats. La purmèra d’aqueras prosejadas que’s debanarà a la Maison de la Cultura Bearnesa au 46 Baloard Alsace Lorraine a Pau, lo dimars 14 de març a comptar de 18.15. Qu’i seràn dus invitats.

Loulou Mandère, qui a devantejat lo Hestau de Siros un vintenat d’annadas, que’ns parlarà deu son amic Joan Claudi Coudouy cantaire coneishut, condaire e  obrèr valent qui prenó lo relai tau Hestau de la canta bearnesa.

Roland Poychicot, cantaire tradicionau, que parlerà de Roger Larrouy dab lo quau e’s liguè d’amistat au parat de seradas bearnesas e en la soa parròpia de Morlaàs. Aqueth caperan, condaire eth tanben, que l’agradava d’escríver e qu’èra tostemps volentari quan calè díser ua missa en bearnés.

Joan Pau Latrubesse qui animarà aquera serada que balharà la paraula a tots los batalaires. Atau, cadun que poderà díser un sovenir, ua hèita o tot simplament pausar questions aus intervienents.

L’entrada qu’ei libra e a gratis.
De cap tà 20.00h la serada que s’acabarà dab lo veire de l’amistat e quaquas cançons.
Rensenhaments : Ostau Bearnés 05.59.30.60.34. e www.ostaubearnes.fr