Un navèth Prèmi Pèir de Garròs
Las edicions Letras d'Òc, qui publican òbras de literatura occitana, que crean adara lo prèmi de traduccion Pèir de Garròs...
 

Las edicions Letras d'Òc que publican òbras de literatura occitana contemporanèa : romans, novèlas, contes e racontes, poesia, teatre…
Se la qualitat literària deus tèxtes qu'ei hèra importanta ta Letras d'Òc, ne desbremba pas la qualitat de la lenga emplegada peus autors, quaus que sian los dialèctes.
Que i trobaratz tanben òbras literàrias mei modèrnas, ineditas o de mau trobar uei lo dia.

Los libes que son editats en occitan o en version bilingüa occitan-francés e quauques obratges que son acompanhats d'un lexic occitan-francés.
La colleccion Camins qu'amassa obratges qui pertòcan la lenga e la cultura deus parçans occitans.
Mes las edicions Letras d'òc que son tanben òbras literàrias màgers arreviradas en occitan :
- "Una cadena de voses" deu sud-african André Brink per Sèrgi Carles,
- "Lo Temps que fai" d’Armand Robin per Jan dau Melhau,
- "La Pèrla" de John Steinbeck per Joan-Peire Lacomba,
- "Lo Capaironet roge" de Charles Perrault per Frederic Figeac,
- "La vida de Lazarillo" de Tormes per Sèrgi Carles...

En seguida d'aquestas publicacions, que crean adara lo prèmi de traduccion Pèir de Garròs, deu nom deu poèta gascon deu sègle setzau.
Que podetz participar en arrevirar òbras literàrias de ficcion en pròsa non-francofòna. L'òbra que deu estar publicada dens la soa lenga d'origina e la traduccion inedita en occitan. Las arreviradas d'extrèits o de tròçs causits ne seràn pas acceptadas, que cau tradusir l'òbra completa.
Lo nombre de signes que deverà estar comprés enter 120 000 e 600 000 signes.

Los participants qu'an dinc au 31 de deceme 2015 tà enviar las lors produccions au secretariat deu prèmi : Letras d'Òc - 5 arrua Pons Capdenier - 31500 Tolosa, ua copia papèr de la soa traduccion e ua copia papèr de l'òbra originau e tanben un fichièr informatic a l'adreça mèl : letras.doc@wanadoo.fr
La jurada independenta e sobirana dens las soas causidas que s'amassarà au purmèr trimèstre de 2016.
L'autor de l'arrevirada premiada que receberà un chèc de 1000 €.
 
Tà arrecéber lo reglament, que podetz enviar un messatge a : letras.doc@wanadoo.fr