Un estiu de hestenaus per l'Occitania tota
Abans Hestiv’Òc a Pau, deu 20 dinc au 23 d’aost, hestenaus de tria que’s debanan drin pertot per aquestes torns...
 

La cultura occitana qu’ei mei que vitèca. Que sufeish d’espiar tot çò qui’s passa cada setmana, cada dimenjada de l’annada a l’entorn de la cultura e de la lenga occitanas.

L’estiu qu’ei sovent lo parat d’organizar eveniments mei anar mei grans, qui prénen de mei en mei d’endom e qui atiran de mei en mei de monde. Abans Hestiv’Òc a Pau, deu 20 dinc au 23 d’aost, hestenaus de tria que’s debanan drin pertot en Occitània.

Aviadas au purmèr de julhet, Les Nuits Atypiques en lo sud de la Gironda qu'arcuelhón dejà mantuns artistas occitans com Verd e Blu, lo bal Brotto-Lopez, La Manufacture Verbale...
Creadas en 1995, qu'an un prètzhèit : avalorar las singularitats artisticas e la diversitat culturau e lingüistica en har descobrir las musicas deu monde que sian modèrnas o tradicionaus, ruraus o urbanas, acosticas o electricas, vocaus o instrumentaus, profanas o rituaus, d'ací o d'aulhors... Concèrts, estagis, master-class, encontres-debats, cinèma que's succedeishen dinc au 19 de julhet. Aquesta dimenjada, qu'arretrobaratz : La Forcelle, Sylvain Roux Trio, Duo Macias e Macias, Le Peuple Etincelle e hèra d'autes...
Mei d’entresenhas sus la 24au edicion de Nuits Atypiques suu site internet : www.nuitsatypiques.org

Qu'arrejunhem adara l'Arièja e lo son Trad'Estiu qui's debanarà a Foish deu 17 dinc au 19 de julhet. Aquí tanben, estagis, bal, condes...que seràn prepausats pendent tres dias. Que tornaram trobar los de Castanha e Vinovèl mes tanben Les Irètges, Ja podes Creir, Revelhet...
Tà'n saber mei, consultatz la pagina Facebook deu Trad'Estiu.

Puish, direccion l’Avairon. L’Estivada, que s’i ei escaduda au briu deus ans, a vàder la mei grana hestejada interregionau de las culturas occitanas e un rendetz-ve de compte har, en presentar  tostemps ua vison moderna d’aquesta identitat, on la lenga ei utilisada com ua lenga de comunicacion, de partatge, en un lòc on s’i escambian las ideas e on, de segur, e s’i pòt har la hèsta.

Com cada fin de julhet, l’Estivada que torna a Rodés, augan deu 22 dinc au 25 de julhet. Aquesta hestejada occitana que presenta tot un programa hèra variat mes totun articulat a l’entorn de la lenga occitana : literatura, musica, danças, teatre, condes o enqüèra conferéncias, devisas, cinèma, gastronomia,… dab la participacion de grops com Du Bartàs, Boisson Divine, La Talvera, Dupain, Artús o Doctors de Trobar...

Totas las entresenhas e lo programa sancèr en clicar suu ligam aqueste :  www.estivada-rodez.org