Un cap d'òbra sus ÒcTele
Per la fin d'annada, ÒcTele que'vs perpausa de véder o tornar véder un cap d'òbra de l'animacion...
 

Solide que coneishetz o qu'avetz entenut a parlar deu cap d'òbra de l'animacion "Ernèst e Celestina".
Lo filme de Stéphane Aubier, Vincent Patar e Benjamin Renner, sortit lo 12 de deceme 2012 que recebó mantuns prèmis au miei deus quaus lo "César" deu miélher filme d'animacion en 2013 e qu'estó seleccionat aus Oscars en 2014.
Peu noste mei gran plaser, l'associacion Conta'm que'n hasó lo doblatge en occitan e ÒcTele que'ns hè un beròi present en difusar lo filme dinc a la fin de l'annada.
Be seré de dòu har de non pas profieità'n !



Dijaus passat, que's debanava lo setzau D'Òc Show consacrat,  un còp non hè pas lei, a las hemnas en luta : dret de vòte, dret d'avortar, egalitat deus sèxes... tres generacions de hemnas, tres combats. Duas òras d'emission pendent la quau la paraula ei balhada a las hemnas, au còr deus Pirenèus, on an ua plaça sociau singulara, e au ras de la Vath d'Aran on la lenga occitana ei oficiau. Rodat au Casino de Banhèras de Lushon, qu'arcuelhó a Isaure Gratacos, Pascale Respaud, Maïté Sarrailh, Evelyne Auban, Patricia Heiniger Casteret, Alidé Sans, Mme Sans, Julie Tucon, Louise Béchereau, Elodie Pujol et Fanny Lartigot.
Qu'ei d'ara enlà disponible en vidèo a la demanda suu site.



Que i podetz véder tanben los cinc purmèrs numèros de la navèra emission literària d'ÒcTele "Libre" tà descobrir :
- "La Santa Estela del Centenari" de Joan Bodon,
- "La fada multicarta"de Micheu Chapduelh,
- "Lo libre dau Reirlutz" de Jan Ganhaire,
- "A travèrs Regas" de Pau Froment,
- "Veritable detalh de l'Aigat de Montalban" de Joan-Pau Laròca.

E cada setamna, un navèth episòdi deus "e-Anem" deu CIRDÒC.

Rendetz-ve doncas sus www.octele.com