Un beròi camin d'artista
Lo Collectiu Ça-I e l'associacion Tiss'liens 64 que's son aliats tà perpausar la setmana qui arriba un camin d'artista dab Benjamin Macke...
 

Lo Collectiu Ça-i e l'associacion Tiss'liens 64 que's son aliats tà perpausar la setmana qui arriba un camin d'artista dab Benjamin Macke.
Aqueste musician deu Nòrd de la França que'ns hasó dejà l'aunor de viéner en Bearn au mes de mai 2014 au parat deu Bal Mesclat organizat per Menestrèrs Gascons dab lo son grop de "musica de Flandras e d'aulhors" : Shillelagh.

Que serà doncas a Vilhèra a comptar deu dimèrcs 11 de noveme tà animar un estagi de musica sus filmes de las annadas 1910 a 1930 e sus archius locaus e deus Pirenèus.
Lo talhèr que's debanarà lo dimèrcs 11 a la "Villa des Violettes" e los dissabte 14 e dimenge 15 a la Sala de Lacaze de 10ò lo matin dinc a l'ua òra lo vrèspe e de las duas òras e mieja dinc a 5ò30 lo vrèspe.
Que s'agèish d'improvisacion libra sus filmes enregistrada en sòlo, duo... e de tornar escotà's tà apreciar lo son tribalh en préner escart.
L'estagi qu'ei ubèrt a tots los instruments e lo son prètz qu'ei de 50€.
Que's cau inscríver auprès deu Collectiu Ça-I au : 06 99 23 08 70 o 05 59 68 84 67.

Lo dijaus 12, Benjamin Macke que serà a l'Universitat de Pau de 2ò dinc a 4ò lo vrèspe tà un cine-conèrt e qu'ei a gratis.

Lo dissabte 14,  la Sala Sent Laurenç, de Vilhèra tostemps, que serà dedicada a la dança tradicionau dab un estagi de sauts bearnés de 10ò lo matin dinc a l'ua òra deu vrèspe e un estagi de branlos aussalés  de las duas òras dinc a 5ò deu vrèspe. Los talhèrs que seràn animats per Jean-Claude Arrosères e Thomas Baudoin.
Entresenhas e inscripcions auprès de Sylvie au 06 78 97 10 37. Lo prètz de cada estagi qu'ei de 10€.

Lo ser a comptar de 8ò30 a la Sala de Lacaze, Benjamin Macke que harà un cine-concèrt e un bal e que serà seguit peu Bal Radicau de Gasconha deu grop Mossur.
Entrada : 10€ e estagi+bal : 16€.

Mei d'entresenhas : www.tissliens64.com