Un beròi arcolin previst a Auloron
Los Seuvetons que presentan la lor navèra produccion a l'Espaci Jéliote lo dissabte 25 d'octobre...
 

Lo temps cambiadís d’aquestes dias que poderé har paréisher solide un beròi arcolin en lo cèu de la capitala deu Haut-Bearn. Mes n’ei pas d’aqueste arcolin de qui volem parlar. Qu’ei meilèu de l’espectacle deus Seuvetons qui serà presentat a l’espaci Jéliote d’Auloron lo dissabte 25 d’octobre, a partir de 21h.

Aqueth espectacle que coneishó ua beròja escaduda per la soa purmèra lo 21 de deceme passat, davant quasi un milierat de personas. De La Seuva enlà, la troperada de cantaires e dançaires que se n’anè de cap tau Castèth de Pau per ua navèra prestacion pendent Hestiv’Òc. Qu’ei ad aqueth parat que lo nom « Arcolin » estó causit.

A l’epòca shens nom, los Seuvetons qu’avèn demandat au monde present de trobar un nom a l’espectacle. Au moment de desplegar los papèrs, lo nom « Arcolin » qu’èra apareishut, com ua evidéncia.

Coregrafiat peu Lionel Dubertrand e hicat en musica per Isabelle Bonnasserre, Arcolin qu’ei 4 ans de tribalh entà un resultat deus bons. Un espectacle colorat per la diversitat de las danças, ua mesclanha de cultura tradicionau e de modernitat, la grana qualitat de las danças e de las cantas… En dus mots…corretz a Auloron lo dissabte 25 d’octobre !

A 21h, la purmèra partida que serà assegurada peus Passerons (seccion mainats deus Seuvetons).

Entradas : 10 € / 5 € (taus caumaires, estudiants, handicapats e mainats de 3 dinc a 8 ans) / A gratis taus - de 3 ans (suus jolhs deus pairs)

Estanquet sus plaça e cantèra plan segur !
A notar que los Seuvetons que s’i hèn despuish trente ans a har vàler la dança e la canta tradicionaus e que son mei de 170 membres dont 60 mainats.

Bilhets en venta a La Seuva: Chez Massaly, Au fournil e Sam'Market e a Auloron : Cave Le Tire-bouchon

Mei d’entresenhas : contactar au Sylvain Bonnet  au 06 45 76 41 53 o sus la pagina Facebook deus Seuvetons