Ua batalèra beròi escaduda
Que i avó monde a Morlaàs a la batalèra mesadèra de La Civada e de l’Ostau Bearnés...
 

 

Que i avó monde a la batalèra mesadèra de La Civada e de l’Ostau Bearnés. Que’s debanè a l’Hôtel de France de Morlaàs e que s’i parlè deus marcats e de las hèiras de l’ancian capdulh bearnés. Mantuns batalaires dab hèra de plaser e d’emocion qu’evoquèn lors sovenirs.

Dinc a las annadas 55-60, a divés passat e deu matin dinc au ser, la plaça de la Horquia e las carrèras vesias qu’arcuelhèn un deus marcats mei grans de la region : bestiar, motons, pòrcs, poralha, legumatge, taulèrs de tots… La gran horrèra que s’atraçava deus vilatges còps que i avè de mei de 30km ! Que vienèn tà véner, tà crompar o tot simplement entà passar ua bona jornada. De segur que i avè de qué minjar, béver e divertí’s : qu’i èran 24 aubèrjas qui servivan hèra sovent la dòba a contunhar dab fòrça pintons e los 15 quilhèrs que retrenivan sovent dinc a las talòras.

Com de tostemps en aqueths aròus de devisaires, cadun que podó pausar questions e se lo cas ei condà’n ua : l’arrelòtge de la glèisa de Sedze-Maubèc qui marcava las datas deus marcats e de las hèiras, quin se marcandejava, los maquinhons rusats, a còps lo venedor borrat, las abitudas, los reglaments, los purmèrs chècs, las pelejas, las benaleias... E de segur, en aqueth horvari gaujós, las nosta lenga d’Oc qu’èra sovirana.

Aquera batalèra particularament apreciada, qu’a amuishat lo riquèr de la nosta memòria collectiva e l’endom de la lenga mestrejada de com cau peus participants. Aquera costuma deus marcats que s’ameritaré un tribalh de recèrca e de collectatge. La serada que s’acabè com tostemps en cançons dab lo veire de l’amistat e la visita deu maire de la comuna.

L’animator Joan Pau Latrubesse qu’arremerciè tot lo monde. Que disó que calè a tota fòrça parlar e transméter la lenga. Que raperè que desempuish un vintenat d’annadas l’associacion La Civada organizava, a Morlaàs, cors de bearnés ubèrts a tots. Mercés a las batalèras, los aprenents que pòden escambiar e progressar dab locutors naturaus.