Tornar sus la Jornada Occitana de l’Elan Béarnais Pau Nord-Est
Resumit d'ua beròja jornada a l'entorn de l'espòrt e de la culturau locau...
 

Lo 13 de deceme passat, lo club de basquet de l’Elan Béarnais Pau Nord-Est qu’organizè, dab lo sostien de l’Ostau Bearnés, ua jornada occitana au parat de la recepcion de l’equipa de Tolosa. L’enveja deus davantejaires qu’èra d’aviar un moment d’escambis e d’acampament taus licenciats, benevòles e tà las familhas en tot har vàler la cultura locau, ubèrta au monde e au territòri occitan mercés a la vienguda deus tolosans.

Lo mieidia, la sala Bruno Tarricq, a las colors deu Bearn e de l’Occitania, qu’orbí los soas pòrtas a las familhas, invitadas a hà’s seguir drin de museta a partatjar en tota simplicitat. Aqueth moment de convivivéncia que’s hasó en cançons dab la participacion de las beròjas votz deu grop Maishanta Lenga.

Lo vrèspe, lo seguici de las partidas (mei d’un detzenat en comptar totas las categorias deus mei petits dinc a l’equipa ua) que deishè ua petita tempora de pausa tà celebrar lo títol de Campion de França deus mensh de 18 ans.
En fin de vrèspe, quauques productors locaus que prenèn plaça a l’entorn deu parquet (que podem mentàver lo maine Ganadé, lo Pastis d’Amelia, Lionel Osmin, Adishatz, los bonets Laulhère…) abans la partida deu ser. Qu’estó de las peludas, mes los bearnés que controlèn los tolosans deu començar dinc a la fin tà préner un avantatge definitiu au planchòt.
Los cantaires de l’Ostau Bearnés que possèn la cantèra tà acabar com cau aquera jornada occitana.
La hèsta que podè estar beròja !

Ací quauques fòtos de la jornada.