Rentrada sus ÒcTele tanben !
Despuish lo diluns 29 d'aost, ÒcTele que ns'ajuda a non pas tròp pensar a la rentrada puish a que difusa lo purmèr numèro de la seria deus 8 Cara e Cara qui estón rodats au parat de Hestiv'Òc...
 

Despuish diluns passat, ÒcTele que ns'ajuda a non pas tròp pensar a la rentrada puish a que difusa los 4 purmèrs numèros de la seria deus 8 Cara e Cara qui estón rodats au parat de Hestiv'Òc. Lo purmèr envitat qu'èra lo director deu hestau : Didier Fois. Que podetz arretrobar tanben Julien Bayssac tà parlar deus benevòles, Guillaume Lopez deu costat deus artistas e  Jean-Luc Lagrave tà çò qui pertòca los alliats economics. Los autes que seguiràn hèra viste, beròja faiçon de demorar enqüèra drin en vacanças...

Qu'avetz tanben dinc a la fin deu mes de seteme tà véder la duas darrèras vidèos deus filmèots realizats per Kaleo Design e produsits peu CIRDÒC de E-Anem titoladas "Mestre Nicoulau" e "A la seguida del Marqués".

Mes l'auta nautat qu'ei la difusion a comptar de la setmana qui arriba deu cort-metratge "Shens papèrs" sostengut per l'associacion Art'Òc qui a per prètzhèit d'acompanhar e de promòver projèctes artistics en lenga occitana o qui's debanan en lo territòri occitan (cinèma, audiovisuau...).
"Shens papèrs" qu'estó difusat lo dijaus 18 d'aost purmèr dia de Hestiv'Òc au teatre Sent Loís. Aqueth filme en occitan e berbèr que tracta de la tolerància e de l'obertura a l’aute peu biaish de la musica e de la dança tradicionaus. Rodat a Aush, qu'arretrobam Philippe Espinasse a l'escritura e a la realizacion, Eva Cassagnet  a la corealizacion, Amic Bedel a la camera e Jan Labourie au montatge. Que recebón l’ajuda de la CAMOM tà l’enregistrament de la cançon. Un trentenat de dançaires que participèn au rodatge qui's debanè lo 8 de mai 2016 tà dar la vita a un rondèu de Samatan. Lo filme qu'ei un cort-metratge musicau en lo quau e's mesclan la vita vitanta d'ua familha de shens papèrs, canta, dança...
L'associacion Art'Òc qu'encontra quauques dificultats tà aver subvencions e tà pagar la postproduccion deu filme (montatge, aficas, dvd, difusion...). Qu'aviè doncas un finançament participatiu suu site Ulule. Qu'a besonh 1 500€ e que demoran enqüèra 49 dias tà ajudar lo projècte : https://fr.ulule.com/shens-papers/

E non desbrombetz pas d'anar sus www.octele.com