Rentrada que rima dab nautats sus ÒcTele
Emission literari, navèra seria, lo D'Òc Show 13... la retrada qu'ei cargada tà la television 100 % en occitan...
 

A comptar de uei, que poderatz espiar sus ÒcTele, ua seria de formats bracs de 2 minutas produsida peu CIRDÒC (Centre Inter-Regionau de Desvolopament de l'Occitan) de Besièrs. La seria qu'estó realizada per Kaleo Design en infografia e que'vs convida a descobrir lo riquèr deu patrimòni occitan de Lengadòc-Rosselhon.

Lo purmèr episòdi "Para lo lop ! Istòria de la Bèstia" que hè referéncia a la "Bèstia deu Gavaudan". Los seguents que pertocaràn au demiei d'autas causas lo "Porin de Pesenàs", lo "Camèu de Besièrs", lo pastèl, Léon Cordes, René Nelli...  Atau cada dimèrcs, ÒcTele que'vs perpausarà un videoguida de la  collecion "e-Anem" deu CIRDÒC en lengadocian de qualitat mercés a las votz de Muriel Batbie-Castell e Ives Durand.

Lo D'Òc Show de rentrada que serà lo numèro 13 e que's debanarà lo dijaus 24 de seteme en dirècte de las « Fargas de Pirèna » a Montgailhard (Arièja) a 8 òras e mieja lo ser. A las comandandas, un presentator de tria, lo Silvan Carrère, que tractarà d'un subjècte deus interessants que son las navèras solidaritats e las economias alternativas: « Quan lo consumerisme e sembla aver viscut la soa òra de glòria, solidaritats navèras e fòrmas navèras d'economia que son a emergir drin pertot : AMAP, co-veituratge, monedas locaus, tròc, reciclatge de materiaus…" .

L'equipa d'ÒcTele que convidarà un detzenat de representants e beneficiaris d'aquestas iniciativas alternativas e qu'obrirà lo debat. Deu costat artistic, que poderatz descobrir o tornar descobrir Muriel Batbie-Castell e Eric Fraj.

De seguir tanben, d'ací quauques setmanas, ua navèra emission literària "Libres" mes que'n parlaram bèthlèu ...

Enfin, taus petits, de non pas mancar, lo 52au episòdi de l'asó Trotet que passarà diluns qui vien sus ÒcTele e qu'ei lo darrèr de la seria !!!

De véder e de tornar véder sus www.octele.com