Prosejada sus la toponimia dab Joan Eygun
L'autor aspés que presentarà lo son darrèr libe, lo dijaus 14 de noveme, a 18h30 a l'Ostau Bearnés
 

Que v’avem presentat quauques setmanas a, la darrèra parucion deu Joan Eygun dedicat a l'estudi deus noms de lòcs pirenencs : "Les mots de la montagne à travers la toponymie de la vallée d'Aspe".
Entà hicar en davant aqueste obratge deus bons, l’Ostau Bearnés que decidè d’organizar ua serada de presentacion deu libe. Qu’ei donc dab plaser qu’arcuelharam l’autor aspés, lo dijaus 14 de noveme, a partir de 18h30 en los locaus de la Maison de la Cultura Bearnesa, per ua prosejada de non pas mancar.

Que raperam que lo Joan Eygun qu'ei l'un deus especialistas mei hidables de l'istòria de la lenga d'òc en Bearn e qu'èra dejà l'autor deu recuelh « Per malhs, sarròts e arrècs » qui amuishava la preséncia e la continuitat de la lenga  capvath la montanha de memòria perduda dinc au dia de uei. Qu’ei tanben lo fondator de las edicions Letras d’Òc / Camins.

Aquesta serada qu’ei solide ubèrta a tots, amators de lenga en generau e de toponimia en particular.

Entresenhas mei : 05 59 30 60 34 o contact@ostaubearnes.fr