Presentacion de la Bibliotèca de l'Ostau Bearnés
Dijaus passat, l'Ostau Bearnés que presentè l'un deus apèrs naveths deu son centre de ressorças...
 

Dijaus passat, los amics e aderents de l'Ostau Bearnés qu'èran convidats a la presentacion deu navèth apèr de la Maison de la Cultura Bearnesa : la bibliotèca.

Après las presentacions deu hons documentari de l'Ostau Bearnés e deu prestat per la Civada, presentacions e lecturas d'escrivans bearnés màgers qu'estón hèitas tà brembar tot lo riquèr de la literatura occitana ací en Bearn.

Solange Pouts, administratora de l'Ostau e cavilha mestressa de l'organizacion e de l'aviada d'aquera bibliotèca que'n profieitè tà díser lo son foncionar abans de har ua visita e har descobrir au monde mei de 500 libes (literatura, istòria, gramatica, tradicions...) e mei de 1400 revistas.

Lo cinquantenat de monde presents qu'an podut descobrir (o tornar descobrir) las missions e activitats miadas per l'Ostau Bearnés e la mustra "Ua lenga, l'Occitan" creada per l'InÒc Aquitània e concevuda per Maurice Romieu e Jordi Fernandez-Cuadrench, mustra bilingua sus l'istòria de la lenga occitana de las originas dinc a uei.

A notar que la bibliotèca orbirà oficiaument au briu deu mes de deceme.

Plus de renseignements : 05 59 30 60 34 ou contact@ostaubearnes.fr