Pòrtas alandadas en las calandretas
En 1979, qu’estó aviada la purmèra escòla Calandreta a Pau dab cinc mainats en los prefabrictas de l’escòla de l’ipodròme de Pau, ara desapareishuda. Uei, Calandreta qu’ei 60 escòlas, tres collègis (Montpelhièr, Pau e Tolosa), mei de 3400 eslhèves shens comptar los regents e milierats d’associatius...
 

 

En 1979, qu’estó aviada la purmèra escòla Calandreta a Pau dab cinc mainats en los prefabrictas de l’escòla de l’ipodròme de Pau, ara desapareishuda. Uei, Calandreta qu’ei 60 escòlas, tres collègis (Montpelhièr, Pau e Tolosa), mei de 3400 eslhèves shens comptar los regents e milierats d’associatius qui s’i hèn tot dia a pala virada tà har víver las escòlas. 

Pr’amor ne’s cau pas desbrombar las calandretas que son escòlas associativas, geridas peus pairs e mairs d’escolans e quitaments si receben lo mei sovent (lo mei ne vòu pas díser tostemps…) ajudas municipaus, quitaments si los regents e son pagats peu Ministèri de l’Educacion Nacionau, que cau enqüèra trobar quate sòus (sic !) tà çò d’aut : pagar tot lo personau d’enquadrament, lo materiau pedagogic, l’agergada de las classas, las còstas de foncionament…

Los curiós qui’n volhin saber mei que seràn servits a la fin deu mes. En efèit, las Calandretas deu Bearn (nau escòlas e un collègi) qu’orbiràn las lors pòrtas au public deu 27 de març dinc au 1èr d'abriu qui averàn l’opportunitat de viéner en classa descobrir aqueras escòlas on s’i practica l’immersion lingüistica en occitan dab la pedagogia Freinet aperada « activa ». 

Rendetz-vos a Artics, Beost, Lescar, Lis, Masèras-Lesons, Auloron, Ortès, Pau, Porciuvas-Bocoa e tanben lo Collègi Calandreta de Gasconha tad aquera 5au edicion.

Que podetz arretrobar lo programa sancèr en clicar ací, la presentacion de las calandretas ací o en anar suu site internet de la Federacion Departamentau de las Calandretas de Pirenèus-Atlantics : www.calandreta-bearn.org