Parlar plan dab Gilbert Narioo
La Civada e l’Ostau Bearnés que v’invitan a ua prosejada lo dimars 11 d’abriu dab Gilbert Narioo...
 

La Civada e l’Ostau Bearnés que v’invitan a ua prosejada qui’s debanarà a lor, au 46 Baloard Alsace Lorraine a Pau, lo dimars 11 d’abriu a comptar de 18.15. Gilbert Narioo, un deus màgers especialistas  deu gascon que’ns presentarà lo son darrèr libe «Parlar plan » qui sòrt de paréisher a las edicions Per Noste. Qu’ei ua compilacion de las 153 cronicas pareishudas de 1985 ençà en la revista Païs Gascons. 

L’autor que diserà perqué e s’ei lançat en aqueras cronicas e qu’aurà lo parat de presentar las qui estima fondamentaus. Los batalaires que s’i haràn tà questionà’u dab punts de sintaxa, de vocabulari e de conjugason. L’invitat que parlarà tanben de l’arrenavida de la lenga e deus mejans qui’u cau entà que torni trobar tota la soa plaça en la vitavitanta.

L’obratge (260p) que’s poderà crompar aqueth ser puish que serà tà véner a la librària de l’Ostau au prètz de 13€. Qu’interessarà tots los qui vòlen cotivar la lenga, que sian començants o locutors naturaus.

L’entrada qu’ei libra e a gratis. De cap tà 20.00, la serada que s’acabarà dab las dedicaças e lo veire de l’amistat

Rensenhà’s a l’Ostau Bearnés 05.59.30.60.34. e www.ostaubearnes.fr