ÒcTele en cèrca d'estagiaris
S'ètz interessats peus mestièrs de l'audiovisuau, de la television, de la comunicacion, las tecnologias navèras e lo numeric, ÒcTele qu'ei en cèrca d'estagiaris...
 

La cadena de television sus internet ÒcTele qu'ei en cèrca d'estagiaris. S'ètz interessats peus mestièrs de l'audiovisuau, de la television, de la comunicacion, las tecnologias navèras e lo numeric, s'ètz estudiants en formacion e que cercatz un estagi en immersion, s'ètz occitanofònes o prèsts a vos sensibilizar a la lenga, que podetz enviar la vòsta candidatura dab un CV e ua letra de motivacion a : contact@octele.com

N'esitetz pas a har vira l'informacion se coneishetz monde qui poderén estar interessats.

Que'n profieitam tà v'informar que lo filme de Philippe CARRESE "Malaterra" ei difusat sus ÒcTele despuish lo 10 de heurèr passat e dinc au 24.

Se n'avetz pas vist aqueste cap d'òbra, amanejatz-ve. Qu'ei l'istuèra d'ua familha pendent la guèrra de 14-18, en hauta Provença, qui viu en autarcia. Lo son univèrs essenciaument compausat de hemnas despuish que los òmis e son anats au front, qu'entertien estranhas rumors de malediccion autorn de Malaterra, un vilatge abandonat pretendut hantat. L'arribada d'un vagamond shord e mut que va exacerbar los conflictes individuaus, partvirar la vita vitanta en aquesta bòrda isolada e revelar lo mistèri de Malaterra, lo vilatge maudit...

Rendetz-ve sus : www.octele.com