Obertura d'ua classa bilingua a Lons
La mairia dab lo conselh municipau sancèr de Lons que pòrtan dab estrambòrd lo projècte d’obertura d'un cursus bilingüe francés-occitan a l'escòla mairau Lartigue...
 

La mairia dab lo conselh municipau sancèr de Lons que pòrtan dab estrambòrd lo projècte d’obertura d'un cursus bilingüe francés-occitan a l'escòla mairau Lartigue dab l’ajuda deu CAP'ÒC e de directoras d’establiments motivadas. Que n’èm au-delà deu projècte pr’amor l’amassada publica qui presenta aqueth cursus qu’ei dejà hèita e que n’èm au temps de las permanèncias entà las inscripcions tà la rentrada de seteme. Los pairs e mairs qui n’an podut desplaçà’s ni a l’amassada publica ni a la purmèra permanéncia tanpòc qu’an donc dus autes rendetz-ve lo divés 31 de març : 

- a l’escòla primària Toulet de 15h45 dinc a 18h45,

- a l’escòla mairau Perlic Sud aus medishs oraris.

Tots los mainats de 2 dinc a 4 ans de la comuna qu’auràn donc la possibilitat de tastar au bilingüisme dorèc. Tà’us qui arrebohan tostemps las medishas sonsainas a prepaus de la causida de l’occitan qui favorizaré un embarrament culturau, e ta’us qui’s chepicaré que n’estosse lo cas, que’us brembam lo bilingüisme qué que sia qu’a nombrós avantatges. A paritat orària (50 % en occitan, 50 % en francés), aqueth ensenhament que balha la possibilitat de comparar lo foncionar respectiu de duas lengas e d’obrí’s a d’autes lengas dab mei d’aisidèr, de favorizar ua obertura d’esperit, lo curiosèr, la toleréncia, l’arrespècte de las diferéncias, de compréner miélher lo son enviroament, de descobrir lo riquèr de la lenga e de la cultura occitana. La sauvaguarda de la lenga nosta, pr’amor que n’èm uei ad aquesta extremitat, qu’ei l’ahar de tots. E quan tots e’s balhan la man dab enveja e obertura, las causas que pòden avançar.