Los occitans per carrèra lo 24 d'octobre qui vien
La grana manifestacion Anem Òc ! Per le lenga occitana ! que's debanarà a Montpelhièr...
 

Après Carcassona en 2005, Besièrs en 2007, un tornar a Caracassona en 2009 e Tolosa en 2012, on s’i carrerapassèn mei de 30.000 personas, la Coordinacion per la lenga occitana (IEO e Calandreta) qu’anonciè quauques setmanas a la data de la navèra manifestacion entà la lenga occitana. Que serà lo dissabte 24 d’octobre e que’s debanarà a Montpelhièr.

La causida deu mes d’octobre n’estó pas presa tad arren, pr’amor quauques dias abans las eleccions regionaus, la manifestacion Anem Òc ! Per la lenga occitana ! 2015, que serà un bon mejan tà l’ensemble deu moviment occitan de’s har enténer.

Abans d’amassar totas las fòrças tà har nombre per las carrèras de Montpelhièr, que cau har un gran tribalh de comunicacion. Uei, l’apèr essenciau tà escàder-s’i qu’ei un bon visuau, qu’ei pr’amor d’aquò la Coordinacion per la lenga occitana qu’organiza un concors entà l’afica de la manifestacion 2015, dotat d’un prèmi de 300 euros.

Las proposicions qu’an d’estar enviadas acompanhadas deu bulletin, abans lo 29 de març a la Confederacion Calandreta - Ostal d’Occitània, Espace Jacques 1er d’Aragon, 117 Rue des Etats Généraux 34000 Montpellier 04 67 06 81 16 o per corric a comunicacion@calandreta.org

Entau reglament sancèr e tà telecargar lo bulletin d’inscripcion, clicatz ací.

Mei d’entresenhas sus la manifestacion Anem Òc ! Per la lenga occitana ! 2015 : coordinacion.perlengaoccitana@gmail.com