Los mainats que s'i hèn a la pastorala
Peu purmèr còp, ua pastorala que serà jogada per mainats...
 

Peu purmèr còp en Bearn, ua pastorala que serà hèita per mainats. En bearnés, que contaràn las granas hèitas d’un joen chivalièr, hilh de Gaston IV lo Crotzat, vescomte de Bearn.

24 mainats, actors, cantaires, dançaires e musicians qu’auheriràn au public un tèxte meravilhós e tota la gestuala gessida de la tradicion de la pastorala. Declamacions, mesa en scèna, tot qu’ei au servici de le lenga e de l’istòria contada, mercés tanben a l’escritura d’Alain Muñoz qui mescla a plaser legenda e realitat istorica.

Que seràn acompanhats en aquera aventura per ua equipa de benevòles de la Pastorala deu País Morlanés, qui n’an pas deishat nat detalh escapà’us. La representacion que’s debanarà lo 21 de deceme au teatre Alexis-Peyret de Sèrras-Castèth, ua sala de las bonas qui balha condicions de tribalh de las bonas a tota la tropa, au nivèu deu confòrt com deu materiau.
 

Las plaças que seràn en venta a partir deu 9 de deceme :
    -a l’Ostau Bearnés, deu diluns dinc au divés, de 9h30 dinc a 12h e de 14h dinc 18h
    -a Morlaàs, au petit teatre de la mairia, tot dissabte de 10h dinc a 15h

A notar que la pastorala que serà filmada e los DVD que poderàn estar reservats en soscripcion lo dia de la representacion.

Duas representacions que son previstas lo 21 de deceme a 17h e 20h.
Obertura de la bilheteria a 16h30 e 19h30
Entrada : 8€ - a gratis peus mensh de 12 ans 

Entresenhas mei : http://pastoralamorlaas.free.fr