Los collegians viatjadors qu’an besonh d’ajuda
Los grops Lambrusquèra e los Esbarrits de Cardessa que vienen a Monenh tà balhar un còp de man...
 

 

Que’vs parlam sovent en la letra d’informacion de las iniciativas de solidaritat divèrsas, prepausadas peus grops e associacions de noste. Repaishs, vueitas-graèrs, espectacles, cantèras…animacions de tot escantilh que s’organizan au profieit de causas quaus que sian. Lambrusquèra

Com se ditz, ne i a pas nat gèste petit e los collegians de Monenh qu’an hrèita d’un petit còp de man. En efèit, los escolans qu’an previst viatges d’estudis deu costat d’Italia o d’Espanha.

Com ac sabetz, taus viatges ne’s pòden pas har a gratis. Ua serada qu’ei donc organizada tà’us ajudar aqueste divés 9 de genèr, de 20h30 enlà, a la sala deu Pont Lat a Monenh. 

Au programa, un concèrt de cantas tradicionaus dab dus grops hèra coneishuts en aqueth parçan e peu Bearn sancèr, Lambrusquèra e los Esbarrits de Cardessa qui an acceptat de jogar a gratis entà har còrda. Que seràn davantejats sus l’empont per dus grops de colegians qui hèn musica cantemporanèa : The Dying Roses e Firework.

L'entrada qu'ei libra, qu'ei a díser que cadun que balha çò qui vòu tà poder assistir au concèrt. A saber que tots los beneficis que serviràn tà har baishar los prètz deus viatges de cap tà Roma, Andòrra o Barcelona e atau, perméter a tots los eslhèves de quataus e aus latinistas e occitanistas de tresau d’en profieitar !

Entà mei d’entresenhas, contactar lo Collègi Jean Sarrailh de Monenh : 05 59 21 30 48