Los cantaires de l'Ostau a Bordèu
Tornar sus la jornada deus cantaires de l'Ostau au Hestenau Mascaret a Bordèu...
 

Que parlam sovent en la letra d’informacion deu tribalh de l’Ostau Bearnés entà la canta tradicionau. La comission Cantem !, en partenariat dab La Civada, qu’organiza per exemple la cantèra mesadera de la Tireuse, los membres que segueishen formacions davantejadas per Pascal Caumont, especialista deu cant polifonic pirenenc, e a còps Cantem ! que respon tanben a las sollicitacions de monde, associacions o organismes qui vòlen har véder o meilèu har enténer cançons de noste en los lors eveniments.

Lo dissabte 5 d’octobre passat, lo seguici de l’aròu de cantaires de l’Ostau Bearnés que quitè Pau a l’esguit deu só de cap tà Bordèu, a l’invitacion de l’Ostau Occitan-IEO 33 qui organizava lo Hestenau occitan Lo Mascaret.
Acerà, lo trentenat de bearnés presents que hasón tringlar cantas de las beròjas entà animar lo mercat occitan installat suus cais de la Garona. Las quauques eishagatadas ne hasón pas paur aus cantaires, qui podón profieitar d’un bon disnar abans d’anar passejà’s per las carrèras de Bordèu. La fin de vrèspe qu’estó reservada a la visita d’un aute institucion de la plaça girondina, lo bar Lo Pépère. Las votz poderosas, acompanhadas peus instruments deus hrairs Masseillou, que rendèn aumenatge a l’arcuelh de tria qui estó hèit a la troperada pujada deu Bearn enlà.
Lo President de la Region Aquitània, Alain Rousset, qui passava tot pròcha, que’s deishè gahar per la gaièra e que vienó cantar un « Aqueras Montanhas » de purmèra.

Lo tornar que’s hasó dens un ambient deus bons. Los qui clucavan drin qu’estón jumpat per cantas pas tròp "catolicas", mes arribat a Pau tot lo monde que’s deishèn urós. Cadun que disè la soa satisfaccion d’aver passat ua bona jornada, mercés en grana partida a l’organizacion shens deca de Hubert Lassus-Pigat.

Quauques fòtos d’aquesta jornada, aci.