Lo sinfonic encontra lo tradicionau
Un encontre enter orquèstras sinfonics e instruments tradicionaus gascons doman ser au Palais Beaumont...
 

N'avem pas sovent lo parat o l'escadença de véder un encontre enter orquèstras sinfonics e instruments tradicionaus gascons. Doman ser, que serà causa hèita.

Cyrille Lehn, inspirat peus compositors deus sègles dètz-e-navau e vintau, qu'a compausat « La suite Gasconne » en perpausar 5 òbras deu repertòri deu parçan Pirenenc. Dab ua orquestracion contemporanèa, luenh d'ua confrontacion deus estiles, que hè aunor a las duas formacions per colors divèrsas.

Tres danças : Hilhòta de delà l'aiga, La vielha de Morlaàs e Lou Branlo Baish qu'exacerban lo costat enairejant de la sonsaïna e de la boha, e dus moments calmes : Quant vòs ganhar ? faïçon cançon de brèç e Nosta dama deu Cap deu Pont... cantada per Joana de Labrit en har vàder au noste Enric IV !

Un espectacle de véder doman ser, divés lo 14 de març a 20.30 a l'Auditorium de Vigny deu Palais Beaumont a Pau.

L'entrada qu'ei libra e a gratis mes la reservacion qu'ei conselhada sus plaça o per telefòne au 05.59.98.40.47.