Lo carnaval Biarnés que torna en Aragon
L'associacion Carnaval Pantalonada qu'organiza ua expedicion hestiva a Ansò lo dissabte 28 de genèr...
 

 

 

 

Lhèu qu'avetz vist deu costat de Pau e de la soa aglomeracion, la cara deu noste Sent Pançard dab un mot "Poder" flocar las parets. E seré candidat a uas eleccions ? Arren d'oficiau mes çò qui sabem qu'ei que lo Carnaval Biarnés e tornarà a Pau deu 23 dinc au 26 de heurèr.
Qu'ei plan mes n'ei pas tornada en Bearn enqüèra, la crapula...
Que'u calerà donc anar cuélher en Aragon.
N'a pas cambiat de destinacion, lhèu n'a pas hèra d'imaginacion tà estuja's. Qu'ei tornat en lo beròi vilatjòt d'Ansò, lo noste Rei deu Carnaval Biarnés.

L'associacion Carnaval Pantalonada qu'organiza doncas ua expedicion hestiva, e non pas punitiva, lo dissabte 28 de genèr tà tornà'u en Bearn.
Dus bus que partiràn de Hauta Planta, un a 11H lo matin qui tornarà a miejanueit e l'auta a l'ua òra lo vrèspe e qui tornarà a 3 òras lo matin.
Lo transpòrt qu'ei de 8€ e que serà demandat aus viatjadors d'estar sòcis de l'associacion. L'adesion a l'annada qu'ei de 10€.
Que'vs podetz inscríver dinc au 25 de genèr en plear lo formulari aci
Las inscripcions e lo pagament que's pòden har tanben a la sedença de l'associacion a l'Ostau Bearnés au 46 baloard Alsace-Lorraine a Pau.
Las plaças que son limitadas. Purmèrs inscrivuts, purmèrs servits !

Avisatz-ve n'i a pas mei de plaças en lo dusau bus !