Lo Papar'Òc navèth qu'ei arribat
Lo grop de musica tradicionau plan coneishut de noste que va presentar lo son navèth disc aqueste dissabte...
 

Dissabte lo 8 de noveme qu’ei un dia deus cargats entà la cultura nosta qui serà en vistas per tots los parçans deu Bearn. Deu costat de Luc, Papar’Òc que presentarà lo son navèth disc en la sala deus lesers, a 20h30.

A despieit deus eveniments tristes deu començar d’annada, los de Papar’Òc ne vòlen pas deishar e que son decidits a jogar enqüèra e tostemps entau plaser de tots los dançaires d’on que sian. « Atau qu’ei », lo lor navèth àlbum, qu’ei compausat solide de musicas a dançar e de sauts dab creacions de Françoise Loudet e de Chantal Bahurlet.

Acompanhadas deus autes musicians deu grop, Pierre Cazaubielh, Mathilde Duffau, Jean-Jacques Mousquès e Sylvette Pouyadou, que profieitaràn d’aquera serada de presentacion tà har dançar lo monde com ac saben har au parat d’un bal gascon : valsas, escotishas, pòlcas, rondèus, sauts bearnés… dab acordeon, boha, flabuta, tamborin… e sustot dens un ambient conviviau e de gaièra.

Atau qu'ei e qu'ei atau dab Papar'Òc !

Aquesta serada qu’ei coorganizada peu Larèr Rurau de Luc e qu’ei a gratis.

Mei d’entresenhas sus Papar’Òc : 05 59 34 35 74 o paparoc@voila.fr - www.menestrersgascons.com