Lo Carnaval que segueish en Vath Vielha
Sent Pançard qu'estó cremat a Pau dimars passat. Aquesta dimenjada, direccion la Vath Vielha...
 

 

Dimars passat, lo hastiau Sent Pançard qu’estó cremat a la Hauta Planta a Pau e còp sec, tots los chepics deu pòble bearnés qu’an seguit.

Non caleré pas créder totun la temporada carnalenca qu’ei clavada. Dissabte que ns’i tornam dab lo Carnaval de la Vath Vielha a Nai, per las carrèras de la vielha bastida. Com cada an, lo carnaval de la Vath Vielha qu’ei apitat en partir d’ua navèra legenda, augan qu’ei « Las Pèrnas d’Alh » (la legenda sancèra, en bilingüe legedera suu site www.carnaval-vathvielha.fr)

Com tot Carnaval qui s’arrespècta, que s’i debanarà un passacarrèra. Lo seguici que partirà doncas de 16h00 enlà, de las Aladas Chanzy dinc a la Halhèra deus Chepics au Teatre de Verdura, en passar per las Plaças de la Republica e Marcadiu. La cremacion que’s harà de cap tà 18h30. 

D’ara enlà qu’ei a l’anciana usina Petit Boy qui’s perlongarà la serada dab lo vin d’aunor, ua cantèra, lo sopar torrinat per la Calandreta deu Lis (entrada, dòba, dessèrt – 10€) e fin finala, un bal gascon animat peu grop Gatamina a partir de 21h30.

 Entresenhas mei : www.carnaval-vathvielha.fr