Lo Carnaval d'Auloron qu'arriba
Lo Carnaval d'Auloron que'vs perpausa de descobrir las tradicions carnavalèras deus Pirenèus...
 

Lo Carnaval d’Auloron que tròba los sons arraditz en las tradicions e las legendas deu Carnaval Biarnés. Mes lo son canavàs que's bròda a l'entorn de l’Istòria de la vila en har tornar víver los sons personatges emblematics, conneishuts o pas, e las hèitas deus barris.
Partatjar e transméter l'esperit d'ua hèsta populara e la cultura locau, amassar los poblants, joens e adultes, tau son los objectius qui gavidan l’accion deu collectiu d’organizacion pilotat per Transmetem.
Cada edicion qu'ei lo teatre d’ua navèra istuèra e lo parat de deishar lo rambalh envadir las carrèras.

Augan que's debanarà lo 30 de genèr sus la Plaça Sent Pèir a comptar de 3ò lo vrèspe mes un preludi qu'ei perpausat lo dissabte 16 dab ua conferéncia e ua mustra.
A 4 òras e mieja, la Mediatèca deus gaves qu'arcuelharà a Thierry Truffaut, diplomat en antropologia sociau e istorica qui parlarà de la descobèrta de las tradicions carnavalèras deus Pirenèus.
Que poderatz tanben véder ua mustra de fotografias d'Éliane Heguiaphal suus Carnavals Pirenencs titolada : "Carnaval est là ! / Carnaval qu'ei arribat ! / Ihaute denbora !". Despuish 20 ans, que segueish los carnavals ruraus : Bielsa (Aragon), Prats de Mollo (Catalonha), Alsasua, Ituren, Lantz (Navarra), Ustaritz, Sent Palais shens desbrombar las mascaradas soletinas.