Lo Carnaval Biarnés qu’ei a Pau
La navèra edicion deu Carnaval Biarnés que comencè dissabte passat e que's persegueish dinc au 17 de heurèr...
 

Lhèu qu’ac sabetz dejà mes la navèra edicion deu Carnaval Biarnés que comencè en la capitala deu Bearn dissabte passat lo 7 de heurèr e que's perseguirà dinc au dimars 17 de heurèr. Augan ua nautat de notar, l’associacion Carnaval Pantalonada qu’a decidit de deishar lo capitèth quilhat en Hauta Planta tà se’n anar deu costat deu Parc de las Mustras.

Augan, qu'estó tanben lo tornar de la Pantalonada. L’an passat, lo Sent Pançard qu’avè renonciat a la soa entrada triomfau en vila tà portà’s candidat a las eleccions municipaus. Mes lo tipe n’èra pas talhat de la husta deus democratas e ne s’i escadó pas. Donc que s’estimè mei de har lo senhor dab tota la soa clica e de demandar çò de devut dab la fòrça.

Lo programa brac de l’edicion 2015 :

Dijaus lo 12 de heurèr : Serada Ròsa
Animacions que son previstas en jornada suu campus de l’Universitat de Pau peu MED'ÒC Paulin, abans la serada prevista au Parc de las Mustras a partir de 20h dab Los de Seiche, Les Sulfateurs Occitans, las musicairas tradicionaus e The Sparteens.

afica carnaval 2015Divés lo 13 de heurèr : Carnaval de las escòlas
2000 mainats que haràn lo passacarrèra per las carrèras deu còr de vila a comptar de 13h30. Taus grans, a 18h, debuta de serada « après lo talh » (after work) dab Manguidem Taf Taf e serada electrò au Parc dab lo Cabaret Bearnés : DJs, magician lasèr e dançaira borlesca...

Dissabte lo 14 de heurèr : Lo Gran Dissabte
Lo començar deu passacarrèra que’s debanarà Plaça deu bearn a 16h. Lo procès de Sent Pançard, a 18h, plaça de la Liberacion. Tornar a 20h au Parc Expo entà passar la serada dab la Companhia Lubat e lo son JazzBal Gasconcubin e Doolin.

Dimars lo 17 de heurèr : Dimars Gras

Sent Pançard, jutjat copable, que serà cremat suu lenhèr au còr de vila. Rendetz-vos a 19h, au Complèxe de la Republica a Pau. Puish vin caut suu pati de la glèisa Sent Jacme a 19h30. La cremacion que començarà augan Plaça deu Bearn (place Clémenceau), a 20h30.

Entà’n saber mei suu programa, sus las listas deus grops, de las animacions, deus parcors deus passacarrèras o tà quinas entresenhas que sian, rendetz-vous suu site deu Carnaval Biarnés : www.carnavalbiarnes.com