Lo Bearn en audiéncia nacionau
Accents du Sud, l’associacion qui gavida lo hestau Hestiv’Òc e qui lança un navèth eveniment a Paris, lo 12 de març de 2016...
 

Qu’ei causa sabuda, lo Bearn qu’a ua manca de notorietat e de visibilitat. Los Bearnés que n’an consciéncia e que s’i hèn adara a trobar mejans entà tornar au Bearn la plaça qui s’amerita.

Qu’avem dejà parlat ací de la decision deu Conselh Departamentau de Torisme 64 d’aviar ua campanha de comunicacion pròpia au Bearn entà que au-delà de Garona, lo monde ne con·honin pas mei los Pirenèus-Atlantics dab lo Bascoat, o enqüèra de l’idea lançada peu François Bayrou de l’aviada deu País de Bearn…
Mes qu’ei auta anóncia qui ns’interèssa uei, la d’Accents du Sud, l’associacion qui gavida lo hestau Hestiv’Òc e qui lança un navèth eveniment a Paris, lo 12 de març de 2016 : « Relevons le Paris »

Aqueste eveniment qu’a per prètzhèit purmèr de har conéisher lo hestau Hestiv’Òc, la cultura nosta e tot çò qui hè lo Bearn uei lo dia, mei que mei auprès de la premsa nacionau e deus arous d’influéncia, puish de crear ua dinamica vertadèra deus actors economics, toristics, culturaus… a l’entorn deu projècte dab la volontat hòrta de parlar e de har parlar deu Bearn dab estrambòrd e fiertat… en dehòra deu Bearn !

Peu moment, ne coneishem pas lo contienut d’aquera jornada mes tota l’equipa d’Accents du Sud que balha rendetz-vos aus sons aliats e amics lo 5 de noveme 2015, au Parlament de Navarra.
En aténer, que comença de har drin de tapatge suus hialats sociaus entà provocar e sentir l’enveja deus bearnés a l’entorn d’aqueste projècte d’endom tau Bearn.

Mei d'entersenhas : www.hestivoc.com