Las polifonias de noste sus France Musique
L’emission « Carnet de voyage » d'Edouard Fouré Caul-Futy que convidè a Jean-Jacques Casteret dimenge passat...
 

Que trucam sovent suus mèdias parisencs, centralizators au mei har e drin mespresós de cap tà las culturas aperadas « minoritàrias ». La diversitat culturau e linguistica de la quau la França e’s vanta cada dia ne s’arretròba pas a la plaça qui s’amerita que sia a la television, la ràdio, la premsa…
Mes a còps, qu’ac cau díser, jornalistas o animators deus bons que balhan la màger part a la cultura nosta, shens la desvalorar o l’espiar dab un uelh condescendent de Paris enlà.

Jean-Jacques Casteret, director de l'Etnopòle InÒc Aquitània, qu’èra lo convidat de France Musique lo dimenge 24 de mai passat en l’emission « Carnet de voyage » d'Edouard Fouré Caul-Futy consacrat aus sons tribalhs sus la polifonia capvath las Pirenèas gasconas.

Aquera emission que hiquè a l'aunor quauquas uas de las granas votz pirenencas enter hèstas, cantèras e granas òras deu Hestau de Siròs : Jean-Louis Laborde-Boy e Jean Bellegarde ; Simon Soulé-Crabérou, Stéphane Chétrit, Serge Parisotto, Jean-Loup Fricker ; Los Pagalhós ; Los Cantaires de Cama ; Los cantaires de Lana ; Los joens de Laruns (en… 1969) ; cantèra dab Lambrusquèra, Balaguèra, Los de Broussez, Monesi, Las mondinas…

L’emission qu’ei de tornar escotar en podcast en clicar ací.