Las Calandretas que’s bolègan
Los pairs de calandrons que s'i hèn tota l'annada tà har víver las lors escòlas. Aquò que passa per l'organizacion de mantuns animacions e eveniments. Un còp mei, que serà lo cas per aquesta dimenjada...
 

Ta’us qui n’ac saben pas enqüèra, las escòlas calandretas que son establiments escolars on l’occitan ei lenga d’ensenhament e lenga ensenhada de la mairau enlà, puish au primari e au segondari. Lo metòde d’ensenhament utilizat per Calandreta qu’ei dongas l’immersion linguistica dorèca en occitan, en emparà’s sus la pedagogia activa « Freinet » qui a per mira de dar la paraula tau mainatge, de’u har vàder autonòme, de regular la vita deu grop e de se’n servir tau com un agent ensenhaire.
En quauquas chifras : 62 escòlas e 3 collègis dab mei de 3600 escolans e collegians, 212 professors de las escòlas e deus collègis, 232 emplegats non ensenhant, shens comptar los milierats d’associatius.
Cada establiment Calandreta qu’ei miat per ua associacion, gavidada per un conselh d’administracion de pairs d’escolans, qui essaja d’animar la vita culturau deu son parçan en tot perméter de trobar finanças tau fonccionar de l’establiment.
Qu’ei lo cas per aquestes torns de mantuas Calandretas deu Bearn que prepausan eveniments :
- La Calandreta de Lescar dab l’associacion Vira Vent qu’organiza ua serada concèrt « L’Escaralhada », lo divés 7 d’octobre a 20h30 en la catedrala de Lescar. Que son invitats los grops Lambrusquèra e Vox Bigerri. Rensenhaments e reservacions : 06 47 61 63 21

- La Calandreta Paulina qu’animarà lo barri deu Heralh a Pau, en l’encastre d’Octobre Ròse e de la hèsta deu barri, lo dissabte 8 d’octobre a comptar de 16h, dab animacions e jocs taus mainats, cantèra, concèrt… Entresenhas mei : http://calandreta-pau.org/

- La Calandreta deu Lis que hè viéner lo grop Nadau a Asson lo dissabte 14 d’octobre a 21h. Reservacions au 05 59 72 56 29

Si’n voletz saber mei sus Calandreta o sus tots aquestes eveniments prepausats per las escòlas, rendetz-vos sus : http://www.calandreta-bearn.org/