La fraternitat e la canta shens termièra
Tà divés purmèr, lo rendetz-vos de la cultura charnego qu'ei a Esquiula...
 

Lo despartament deus Pirenèus-Atlantics qu’a la particularitat d’arcuélher duas « entitats » culturaus plan diferentas, los bearnés e los bascos. Tot aqueth beròi monde que s’avienen plan quan los euskaldunak averén tendéncia a arrecaptà’s quauques produits de noste…lo beret basca de Nai, lo Jambon de Baiona condicionat a Arzac e salat a la sau de Salias-de-Bearn, de qui los sacòts e son esplingats d’ua crotz…basca !

Vam ! N’èm pas ací tà har lo procés deus nostes vesins, aquestas quauques linhas que son solide peguejadas…dab un hons de vertat totun.

Que i a un demiei on los uns e los autes e son sus un pè d’egalitat qu’ei la canta. Los cantaires deus bons deus dus costats de la termièra ne mancan pas. Lo divés 6 de deceme, lo vilatge d’Esquiula, conhit enter Auloron e Mauleon, plan coneishut deus hestaires deu monde sancèr, qu’arcuelha un kantaldi a comptar de 21h en la glèisa.


Organizat per l’associacion Aintzina Eskiula (associacion de canta, musica e dansas soletinas), lo programa que’ns harà viatjar enter diferents grops de cantaires deu parçan, e que deisharà la plaça a grops bearnés com Vath d’Aspa, La Brana de Monmans e las sòrs Cousié de Lana en Varetons.

Au clavar de l’espectacle, un estanquet que serà ubèrt a tots sus la plaça deu vilatge, devath un capitèth cauhat. Qu’ac cau jogar qu’ajudarà a apatzar las relacions diplomaticas e culturaus deus dus vesins.

Entresenhas mei : aintzina.eskiula@ymail.com