La cantèra joens que torna tà l’aute dimèrcs
Los amators de canta tradicionau que's balhan rendetz-vos lo dimèrcs 19 de març...
 

Au demiei de totas las animacions perpausadas per l’Ostau Bearnés, las cantèras que fonccionan de plan, la pròva que n’ei la frequentacion mei anar mei hauta d’aquestas seradas. Lo prètzhèit que n’ei la sauvaguarda d’un patrimòni, mes sustot lo plaser de s’amassar e de cantar.

Com ac sabetz lhèu, duas cantèras mesadèras que’vs son perpausadas sus Pau. L’ua, cada purmèr dimèrcs de cada mes en colaboracion dab la Civada e qui’s debana au bar la Tireuse, plaça deu Heralh, e l’auta au bar lo Bikini, barri deu Triangle, cada tresau dimèrcs de cada mes. E justament, dimèrcs qui vien, lo 19 de març, que’s debanarà la cantèra « joens » deu mes.

Aquesta serada qu’ei ubèrta a tots los amators de la canta tradicionau, e qu’ac tornam díser quin que sia lo vòste atge. Los debutants ne son pas estremats pr’amor de l’ajuda deus iniciats qui’us ajudan a progressar.

Que s’i canta en polifonia solide, cants tradicionaus mes tanben mei contemporanèus. Qu’ei un moment d’escambis a l’entorn de la canta tradicionau e de la cultura bearnesa en generau.

N’ajatz pas paur donc de possar la pòrta deu Bikini, au barri deu Triangle, lo dimèrcs 19 de març, a comptar de 21h.

Entresenhas mei : 05 59 30 60 34 o www.ostaubearnes.fr