La Novem hens la capèra de Caubin
Las quate cantadoras de La Novem que daràn un recitau a non pas mancar hens la meravilhosa capèra de Caubin a Artés.
 

Que hè vint ans uei qui lo grop vocau La Novem - gessit de l'associacion Novem Companhia e Inventura, sòcia de l'Ostau Bearnés - e tribalha sus quin a.hortir l'identitat linguistica e musicau deu país noste. Au truvèrs de la canta, que va au mei pregond tà conéisher miélher la cultura d'ací, e tà la har tornar descobrir au monde, en tot téisher ligams dab culturas luenhècas, per exempe mercés au forum Votz Crotzadas qui apitèn n'i a pas guaire dab los cantadors de l'Isla de la Reunion.

Totun non caleré pas créder La Novem e demora hens ua practica sonque tradicionau de la canta. Que vòu meilèu, en partir de la reconeishença e de l'appropriacion d'aquera identitat hòrta, preparà's a la modernitat e orbí's a las autas culturas.
E aquò quac poderatz véder vos medishs aqueste dissabte, de ueit òras e mieja deu ser enlà, hens la meravilhosa capèra de Caubin, en un bordalat d’Artés.

Las quate cantadoras de La Novem que daràn un recitau a non pas mancar, devantejat per Geneviève Laulhère-Clément. La purmèra partida qu’ei aucupada per l’espectacle « Anueit que hè vint ans… » pr’amor que hè vint ans adara qui La Novem escota, mirandeja puish desvela lo riquèr vocau de noste, vadut mercés a la lenga deu país : la plaça de la votz, l’art de har soar las vocalas, lo caminament d’un diftongue… L’empontatge qu’ei hèit entà bastir un pontet enter tradicion e creacion, en partir d’un repertòri de « tradi-creacions ». La dusau partida de la serada qu’ei lo qui apèran « Encontre », un espectacle e un collectatge viu, en dirècte, en situacion artistica, e en osmòsi dab lo public participatiu. La Novem que fabrica atau un ambient de hidança e d’emocion e que demanda responsas cantadas au public. A tot còp, tot aquò que balha moments musicaus magics, unics e efemèrs : vertadèrs testimoniatges d'idetitat vocau…

Mei d’entresenhas : gclementlaulhere@gmail.com o 05 59 66 26 48.