L’Ofici Public per la Lenga Occitana que vien a la lutz
5 regions amassas per la lenga occitana...
 

Lo dimercs 13 de noveme, ua delegacion occitana qu’èra recebuda au Ministèri de l’Educacion. David Grosclaude (Aquitània), Guilhèm Latrubesse (Mieidia-Pirenèus) e Marcel Matèu (Lengadòc-Rossilhon) qu’èran presents entà parlar de la creacion de l’Ofici Public per la Lenga Occitana (OPLO).


L’OPLO qui amassa 5 regions occitanas de França (Aquitània, Mieidi-Pirenèus, Lengadòc-Rossilhon, Ròse-Aups e Lemosin), que determinarà e que co-ordinarà las politicas inter-regionaus en favor de l’occitan subertot per l’ensenhament. Ua situacion mei clara per l’Estat qui, enlòc de tribalhar dab mantuns interlocutors, n’averà un solet dab qui elaborarà ua politica lingüistica.

Aqueth tipe d’organismes qui existeish dejà peu breton e peu basco, que permeterà peu purmèr còp a 5 regions de tribalhar amassa. A costat de l’OPLO, que serà creat un comitat consultatiu compausat de las associacions màgers occitanas, qui seràn consultadas regularament suus projèctes aviats per l’Ofici.

Duas questions que’s pausan adara. Purmèr, l’Ofici qui deveré fonccionar de l’estiu 2014 enlà, qu’aten lo nivèu de participacion financèra de l’Estat qui serà votat per cada amassada regionau per la prima 2014. Fin finala, ne sabem pas enqüèra on s’establirà l’OPLO.

Ahar a seguir…