L'Estagi 2013 a Arsac
Dus dias consacrats a la musica, las cantas e danças trad los 23 e 24 de noveme...
 

En aqueste fin de mes, l’un deus eveniments de musica tradicionau aviat peus Menestrèrs Gascons que torna. L’Estagi 2013 que’s debanarà los 23 e 24 de noveme a Arsac.

 

Aqueths dus dias que seràn consacrats a talhèrs de musica, danças e cantas davantejats per monde coneishuts e arreconeguts deu demiei de la musica tradicionau deus dus costats deus Pirenèus. En mei d’aquò, un gran bal qu’animarà lo dissabte ser dab los animators de l’estagi e los musicians de Menestrèrs Gascons, shens desbrombar los aperitius e repaishs qui balharàn d’aconòrt aus estagiaris.

 

Au programa donc, 4 talhèrs :


 - Danças de Catalonha dab Ramon Cardona e Bruel : aqueste obrador que serà ua introduccion e un apregondiment aus genres principaus de Catalunya Vella (mitat nòrd de la Generalitat). Qu’ei ubèrt a tot nivèu mes qu’ei demandat ua experiéncia en dança.

- Sauts Bearnés dab M.C Hourdebaigt, J.J Habarés e B. Larradet : iniciacion aus sauts bearnés, aprentissatge de las basas, quin reconeishe’s dens un saut, escotar la musica, utilizar lo cant au « traderai »,… Nivèu debutants.

- Flabuta/tamborin dab Diago Lezaun : l’un deus mèstes deu « Chiflo aragonés » que perpausarà dus grops. Lo purmèr, introduccion a la musica aragonesa e aprentissatge deu repertòri. Lo dusau, tribalh suus mòdes tradicionaus aragonés, mesa en practica deu repertòri aragonés de cap tau repertòri gascon. Tot nivèu acceptat manca los grans debutants.

- Guitarra dab Denis Frossard : apprentissatge de las tecnicas  de « rasgueados », las adaptar au voste repertòri entà enriqui’u e renovelà’u. Tot nivèu manca los grans debutants.

Si voletz mei d’entresenhas suus oraris, talhèrs o modalitats d’inscripcion que podetz contactar los organizators au 05 59 62 11 59.

Lo bulletin d’inscripcion qu’ei a tornar, dab lo pagament, abans lo 13 de noveme. Que’u trobaratz suu site www.menestrersgascons.com.