Hèsta de la Calandreta Paulina
La Calandreta Paulina, com cada an, qu’organiza la soa hèsta de fin d’annada escolara...
 

Las vacanças que s’apressan a granas camadas, e non demoran pas briga de dias aus mainats abans la pausa estivenca. La Calandreta Paulina, com cada an, qu’organiza la soa hèsta de fin d’annada escolara.

Los calandrons, los regents e los associatius de l’escòla calandreta paulina qu’an lo plaser de’vs convidar a la Hèsta los 27 e 28 de junh a viéner en los locaus de la carrèra Guynemer, a Pau.

Lo divés 27, a 6ò deu ser, que serà Plaça aus mainats dab los calandrons tà la purmèra animacion de la dimenjada e a 7ò deu ser, jòcs e restauracion sus plaça.

L’endedia, lo dissabte 28, qu’ètz convidats de cap tà 7ò deu ser tà un aperitiu auherit, un mercat deus produits calandreta e ua iniciacion aus sauts bearnés. A 8ò30 deu ser, que serà lo repaish dab ua paelha au menut. Ua bèra serada atau ne’s pòt pas acabar shens musica e danças, que serà donc lo trio Croc’Stana qui animarà lo bal a partir de 10ò deu ser.

Tarifas deu repaish : 15€ taus adultes e 5€ taus mainats de -12 ans.

Entresenhas mei e reservacions a l’Ostau Bearnés au 05 59 30 60 34.