Gran huec de chepics tà sauvar Naion Canalhon
Après Pau, non caleré pas créder totun la temporada carnavalenca qu’ei clavada...
 

Lo dimars 17 de heurèr passat, lo hastiau Sent Pançard qu’estó cremat en Plaça deu Bearn a Pau e còp sec, tots los chepics deu pòble bearnés qu’an seguit.
Non caleré pas créder totun la temporada carnavalenca qu’ei clavada.

Doman passat que ns’i tornam dab lo Carnaval de la Vath Vielha a Nai, per las carrèras de la vielha bastida.

Com cada an, lo carnaval de la Vath Vielha qu’ei apitat en partir d’ua navèra legenda, augan qu’ei « Lo putz de glaç ». Lo praube Naion Canalhon emposoat peu baron de Coarasa qu'ei presoèr d'un putz de glaç. Que calerà un gran huec de chepics tà sauvà'u... (la legenda sancèra, en bilingüe legedera suu site www.carnaval-vathvielha.fr).

Com tot Carnaval qui s’arrespècta, que s’i debanarà un passacarrèra. Lo seguici que partirà doncas de 17h00 enlà, de las Aladas Chanzy dinc a la Halhèra deus Chepics au Teatre de Verdura. La cremacion que’s harà de cap tà 18h30.

D’ara enlà qu’ei a l’anciana usina Petit Boy qui’s perlongarà la serada dab un aperitiu-trad dab L'Amicale Bout'de Bois e fin finala, un bal gascon animat peu grop Tiquetantolha a comptar de 22h.

La restauracion que serà assegurada per la Calandreta de Lis.

Entresenhas mei : www.carnaval-vathvielha.fr