Fin d’annada e estiu cargat entà las Calandretas
Las vacanças que s’apressan a grans camadas mes l’actualitat de Calandreta n’ei pas enqüèra acabada...
 

Las vacanças que s’apressan a granas camadas, e non demoran pas briga de dias aus mainats abans la pausa estivenca. Mes l’actualitat de Calandreta n’ei pas enqüèra acabada.

Que’ns parlèm la setmana passada la Calandreta Paulina, com cada an, qu’organiza la soa hèsta de fin d’annada escolara, los 27 e 28 de junh en los locaus de la carrèra Guynemer, a Pau. Que serà lo parat de tornar sus l’annada acabada mes tanben de hestejar la beròja escaduda deus mainats de la Calandreta Paulina.

Entà associà’s a la comemmoracion deu centenari de la Grana Guèrra, los eslhèves qu’an participat au concors «Petits artistes de la mémoire, la Grande Guerre vue par les enfants» aviat par l’Ofici Nacionau deus ancians combatants e victimas de guèrra. Per açò, qu’an creat l’espectacle « Un còp èra… Jan, John and Jazz » qui estó jogat au mes d’abriu passat e sustot qui s’a emportat lo 1èr prèmi departamentau !

L’espectacle qu’ei adara disponible en DVD au prètz de 10 €.

Comanda : contact@calandreta-pau.org

Deu costat deu Seuvèstre, la Calandreta de Porciuvas-Bocoa que prepausa abans las vacanças lo son vueita-graèr. Un hèish d’animacions que son previstas tot lo dia deu dimenge 29 de junh, de 9h dinc a 17h : un concors de petanca, hèra de lòts a ganhar, un mercat deus productors… Que serà possible tanben de har bèras passejadas sus un  aso.

Drin mei luenh, au calendèr, las hèstas d’Ortès. Las purmèras indiscrecions que començan d’arribar de la ciutat de Febus enlà. L’associacion D’Òc si Gausas qui harà lo sièti deu Pati deu Musèu Joana de Labrit deu 25 dinc au 29 de julhet, que prepausarà musicas e animacions de las bonas en tot har la hèsta. Au programa : cantas tradicionaus, grops d’Occitania (Dià, Papà Gahús, Brick a Drac…) e d’aulhors (Heymoonshaker, Les Ramoneurs de Menhirs…). Que v’en tornaram parlar aquestas setmanas…

Entà acabar, direccion la Vath d’Aussau, lo dissabte 2 d’aost, on la Calandreta de Lis e v’invitarà a descobrir un tròç de cultura catalana a véder a tot hòrt: los castellers. Aqueras piramidas umanas que seràn au miei de tota ua jornada d’animacion deu costat d’Arudi (passacarrèra musicau, mercat paisan, jòcs, bal, concèrt…).

Mei d’entresenhas sus aqueth estiu deus cargats : www.calandreta-bearn.org