Escriver en lenga d’Òc tau cinèma e la television
Purmèra edicion deu seminari « Escriver en lenga d’Òc tau cinèma e la television » aqueste dissabte a Salias...
 

La purmèra edicion deu seminari en residéncia « Escriver en lenga d’Òc tau cinèma e la television » que comença aqueste dissabte a 9ò30 deu matin a Salias.

En deceme 2012, los purmèrs encontres professionaus de l’audiovisuau occitan organizats per l’associacion « Accents du Sud » que's debanèn au Casino de l'Ostaleria deu Parc de Salias.
En mai 2014, « Clap de Lenga », hestenau de cinèma occitan, que vadó. Que comprenèva difusions de filmes, un concors de scenari de corts-metratges en occitan, encontres professionaus.

Ad aqueth parat, los realizators, productors e difusors presents qu'insistín sus la necessitat de desvolopar la cadena de produccion audiovisuau, qu’ei a díser de l’escritura dinc a la mesa en produccion.

Que serà causa hèita dab aqueth seminari organizat per ACT Formation e ÒcProd dab lo sostien financèr deu departament deus Pirenèus Atlantics, de las regions Aquitània e Miègjorn-Pirenèus.
Enquadrats per especialistas de l’escritura,  7 autors originaris de l’Occitania tota que tribalharàn pendent ua setmana. Que seguirà un « script doctoring » en linha de cinc mes.

Francis Fourcou, realizator, scenarista, productor e distribuidor de longs metratges, Marc Khanne, scenarista, realizator, autor d’un long metratge e de numerós filmes de documentari, qu’animaràn la formacion e qu’acompanharàn lo « script doctoring » dab Alem Surre-Garcia, escrivan de lenga occitana, locutor castelhan, occitan e francés, Jean-Pierre Denis, realizator de « L’Histoire d’Adrien », « La palombière », « Les blessures assassines » e Alexis Quentin, scenarista de lenga occitana. La formacion que s’acabarà lo 15 de junh 2015 per un encontre dab productors e difusors, a l’Ostal d’Occitania a Tolosa tà concretizar los projèctes per produccions.

En aténder aqueras navèras produccions, que podetz espiar los divèrs programas d'ÒcTele :
www.octele.com