Escota Si Plau que tira lo capèu
Lo grop d'Angais qu'anoncia que non pujarà pas mei suus emponts...
 

Ua novèla que ns’arribè en fin de setmana passada. Dab susprèsa, lo messatge signat deu Jausèt Veron-Durand, gavidaire deu grop e contaire d’engenh, que ns’anonciè que lo grop Escota Si Plau anava deishar de pujar suus emponts. Lo mei simple tà’vs parlar d’aqueth grop de compte-har en Bearn, qu’ei de’vs difusir lo mot que recebom quauques dias a.

« Lo grop ESCOTA SI PLAU qu'a decidit de deishar de pujar suus emponts d'ací e d'enlà, après trenta e dus ans d'un hèra beròi camin. En tant d'annadas, darrèr tostemps lo medish capdau, los nostes cantadors qu'an hèit retrenir la lenga nosta hens dotze païs d'Euròpa : Portugau, Espanha, Italia, Soïssa, Luxemborg, Païs-Baishs, Belgica, Alemanha, Austria, Tchequia, Polonha, Bulgaria, hens la mieitat deus departaments de França, per la Bretanha, la Normandia, la Picardia, la Torèna, la Lorèna, l'Alsàcia, la Campanha, la Borgònha, la Provença, lo Lengadòc e peus tots los departaments, o chic se'n manca, de l'Aquitània e de Mieidia-Pirineus.  Qu'an apitat 25 Cantaulejadas, un bon vintenat d'encontras internacionaus o interregionaus, hens lo vilatjòt d'Angais.

Lo terç deus membres sons qu'acompanha lo grop despuish la debuta e quasi tots los autes despuish mei de detz ans. Aquesta beròja fidelitat que hè rampèu a ua envielhida despietadosa. Mes ESCOTA SI PLAU ne va pas deishar tota activitat : ua tant grana caminada qu'a heit eshlorir ligams pro hòrts enter los cantadors qui an enqüèra enveja, amassa, de cantar e batalar en biarnés, de har passejadas e hartèras... »