E un aute entaus Pagalhós !
Après un disc collector sortit quauques setmanas a, los cantaires de la Pagalha que presentan lo lor navèth tribalh...
 

Avem besonh de presentar enqüèra un còp los Pagalhós ?

Taus qui non serén pas assabentats e en quauques mots : ua troperada gaujosa, amorosa e arderosa defensora de la lenga occitana, devoada au jurançon doç e a la timpona, e qui sap transméter un plaser deus grans dab las soas polifonias tostemps asseguradas, e açò despuish mei de 40 ans !

Si’n voletz saber mei, lo mei simple qu’ei d’anar consultar la lor discografia. Que s’escad plan, pr’amor en 2014, l’activitat deus cantaires de la Pagalha qu’ei cargada. Après un disc « collector » sortit quauques setmanas a, un navèth CD que punteja.

Las maishantas lengas, qui’s pensan e qui disen que la canta tradicionau ei somsainèra e avegiva, qu’auràn lo parat de’n descobrir lo contrari e d’encanalhà’s en escotar las 17 cançons  d’aqueth navèth òpus titolat « Sauceda ». Aqueras cantas que son tiradas deu repertòri tradicionau aquò solide, mes meilèu lo cantat en fin de repaish quan ne i pas arren mei a botelhar o en los vestiaris de rugbi. Donc, cantas arridentas, pègas e tanben drin…peberudas. Los Pagalhós que’n profieitan entà har aunor a l’aubèrja, un lòc de vita e de hèsta vertadèr mei anar mei en aulor de raretat, qui amassè lo monde dens cada vilatge bearnés, deu mei petit au mei gran.

Sauceda qu’ei disponible :

-          A l’Ostau Bearnés : 46 Boulevard Alsace-Lorraine a Pau

-          A la libraria Marrimpouey, plaça de la Liberacion a Pau

-          Suu site internet deus Pagalhós

-       E tà acabar (dab ua expression adara consacrada) auprès d’un Pagalhós de proximitat