E se la Setmana e desapareish...
Lavetz, còp de reclama, "buzz" o vertadèra interrogacion ?
 

E se La Setmana e desapareish ? Ua question en letras blancas sus un hons negre qui hè la ua deu jornau despuish la setmana passada e qui n'ei pas shens brembar aus poblants de l'aglomeracion paulina la darrèra campanha de comunicacion de la comunautat Emmaüs Lescar-Pau. Lavetz, còp de reclama, "buzz" o vertadèra interrogacion ?

Vint ans a, au mes de mai 1995, que vadó lo purmèr e unic setmanèr en occitan : La Setmana mercés a sostiens de qualitat com l'escrivan Max Roqueta qui signè lo purmèr edito.

En vint ans, La Setmana n'avó pas nat cès d'evoluar dab cinc cambiaments de formula. Cada equipa que s'i hasó tà portar quauquarren de mei a la version precedenta.
A l'òra d'ara, a despieit deus esfòrç consentits e pr'amor de la multiplicacion deus utís numerics, be cau constatar que la premsa escriuta ei en sofrença. E La Setmana non hè pas excepcion...

La societat Vistedit qu'emplega a quate salariats, ua directora qui ei tanben maquetista de La Setmana, ua comptabla, ua web-jornalista a temps parciau e un cap redactor. La medisha equipa que s'encarga de publicar las revistas taus mainatges Papagai e Plumalhon. Segur que haré hrèita de mei de monde tà poder tribalhar en miélhers condicions. Lo setmanèr n'ei pas briga subvencionat a despart d'ua ajuda deu Ministèri de la Cultura per las còstas postaus (ajuda hèra mei importanta balhada a tots los autes jornaus).
La Setmana n'a pas qu'ua ressorça : los abonaments.

Uei, La Setmana que hè doncas ua crida au sostien. Qu'existeishen mantuas faiçons d'ajudar lo setmanèr e de'u har víver : escríver articles, hà'u conéisher e mei que mei abonà's...

Que podetz léger l'article "Quin avenir per La Setmana ?" en clicar ací o telecargar lo bulletin d'abonament e de'u tornar dab lo vòste mòde de pagament a l'adreça :
SCOP Vistedit, BP 50 486, 64238 Lescar Induspal Cedex