Dus concèrts a viéner taus Pagalhós
Los Pagalhós que'ns preparan dus concèrts...
 

Que ve'n parlavam duas setmanas a, Los Pagalhós que seràn a Auloron lo divés 25 d'abriu qui vien. Que'vs balhan rendetz-ve a 20H30 a la Sala Jéliote tad un concèrt deus grans

organizat peus pairs d'eslhèves de l'escòla de Pondeilh au profieit de la CLIS (Classa tà l'inclusion escolara) e de la seccion bilingua de l'escòla elementària qui an un projècte comun de viatge au centre deus PEP de Peyranère en Vath d'Aspa. Que serà seguit per ua cantèra.

Entrada : 12€, plaças en venta a la bilheteria deu Leclerc-Espaci culturau d'Auloron.

  

Que seràn tanben a Assat, lo dissabte 10 de mai e acompanhats per l'Armonia d'Òc'casion e los cantaires de la Brana de Ger per un concèrt de sostien a l'associacion deu CLAB ( Conservatòri deus Legumes Ancians deu Bearn) a la Sala Polivalenta a 20H30, seguit tanben d'ua cantèra.

Las plaças que son a 12€ e a gratis taus mensh de 15 ans, assedudas mes ne son pas numerotadas. Que podetz trobar bulletins d'inscripcion a l'Ostau Bearnés.

 

Entresenhas au 05 59 06 05 93, lo concèrt qu'ei organizat dab la participacion deu Comitat de las Hèstas e de Music'Assat.

  

 

collector_pagalhos.jpg

E de non pas desbrombar, Lo « Collector » qui amassa los dus purmèrs àlbums viniles deu grop : Los Pagalhós cantan lo Bearn e Sonque l’enveja de marchar, sonque 12€, qu’ei  balhat o quasi...


En venta a l’Ostau Bearnés, suu site www.pagalhos.com o auprès d’un Pagalhós de proximitat, com disen !