Dimenjada occitana a Salias
La ciutat de la sau que s'afaitarà de roi e d'aur los 7 e 8 de heurèr qui vienen...
 

Un còp non hè pas lei mes Salias que s'afaitarà de roi e d'aur los 7 e 8 de heurèr qui vienen.
Joan Francés Tisnèr. Salias / Salies de Béarn 64270
Lo divés 7, la sala Jean Monnet qu'arcuelharà Joan-Francés Tisnèr.
Vadut a Salias, lo cantaire e musician, plan coneishut a noste, que presentarà un espectacle "La votz singulara" en companhia de Jakes Aymonino a la votz e a la guitara e de Roman Baudoin a la sonsaina.
Tribalhat en amont dab escolans e collegians, qu'ei un espectacle a faiçon.
Que's debanarà dens l'encastre de la Sason Culturau de Salias a 21H.

Tarifas : 15€, 10€ taus estudiants, caumaires, grops e a gratis taus mainats de mensh de 12 ans.
Reservacion conselhada au 05 59 38 00 33.

 


L'endedia que serà l'òra d'arcuélher Sent Pançard, lo rei deu Carnaval Biarnés.
Lo rendetz-ve qu'ei balhat a 16H au Jardin Public.
Lo passacarrèra que començarà a 16H30 e lo brave Sent Pançard que i encontrarà las figuras emblematicas de Salias : los tiradors de samèus e herradas, los picatalòs, la Muda, lo sanglar...
Que s'i harà dab los Jòcs Bearnés, lo tipe !
Lo seguici que serà animat per l'Harmonie, los Cuivres Salisiens, Arraya e Los Chancaires dab la participacion deus mainats de las escòlas, de la Jurade du Sel, de Erdiska Lauetan e FA SI LA Danser.
La serada que's debanarà devath las arcadas de la plaça deu Bayaà dab ua cantèra, danças tradicionaus, la padèra giganta e un gran bal dab Ibiliz.
Un gran vrèspe de hèsta organizat per l'associacion Grands Evènements !

Reservacions tau repaish (12€ dab vin e cafè) au 06 25 06 20 70.