Dançatz
Los ahamiats de danças tradicionaus de noste qu’an e qu’auràn enqüèra de que clacar en 2015...
 

Que cambiam d’annada mes ne cambiam pas las costumas. Los ahamiats de danças tradicionaus de noste qu’an e qu’auràn enqüèra de que clacar en 2015. Shens parlar de tots los obradors qui’s debanan cada setmana en cada parçan deu Bearn, que’ns vam har lo reclam de duas dimenjadas consacradas a la dança.

Purmèr, aquestes dissabte 10 e dimenge 11 de genèr, deu costat de la Bigòrra a Aurelhan, l’associacion Lou Peyroutou qu’organiza un estagi sus las danças e cantas drin desconegudas d’aqueth parçan de Gasconha.

Programa deus estagis deu dissabte 10 e dimenge 11, a l’escòla « des Cèdres » :

-    Repertòri de cants desbrombats en seguir collectatges de Xavier Ravier auprès de cantaires vaduts enter 1875 e 1905, dab Pascal Caumont, professor au Conservatòri de Tarba, director vocau de Vox Bigerri…
-    Danças de Bigòrra : hons de danças ancianas e mei recenta de danças gessidas de la contra-dança dab Lionel Dubertrand, formator en danças tradicionaus gasconas, mèste de danças… e Joan-Francés Tisnèr, cantaire, musician, autor-compositor.

Tarifa : 50 €

Lo dissabte ser, un bal que’s debanarà au Centre culturau d’Aurelhan dab lo grop bigordan Eths Autes e dab la participacion de Lionel Dubertrand e Joan-Francés Tisnèr.
Entresenhas mei au 06.08.05.46.77 o christiane.bordes@orange.fr


 
Puish, que tornam en Bearn, a Vilhèra mei precisament. L’associacion Tiss’Liens 64 que i organiza dejà despuish tres ans, los adara famós divés trad, a l’entorn d’iniciacions a las danças tradicionaus e d’emponts ubèrts taus musicians.
Lo divés 16 de genèr que serà lo parat de descobrir lo purmèr divés trad de 2015 e l’endedia, dab l’ajuda deu Collectif Ça-i, que’s debanaràn estagis de borrèias e un gran bal a la sala Delacaze a Vilhèra.
Programa deu dissabte 17 de genèr:
Estagis de borrèias a 3 temps animats peus auvernhats de Quaus de Lanlà : 2 nivèus (debutant, intermedari)
-    1èr estagi de 10h dinc a 12h30 (intermediari)
-    2au estagi de 14h30 dinc a 17h30 (debutant)
Lo ser, lo gran bal :
-    21h : Duo Becut Camecruda (Gasconha)
-    22h30 :Sauts et Branlos bearnés
-    23h : Quaus de Lanlà (Auvernha)
-    00h30 : … susprèsa !

Tarifas : Bal : 7 euros ; 1 estagi : 10 euros ; Stage + bal : 15 euros – A gratis taus mensh de 18 ans
Entresenhas e inscripcions (abans lo 10 de genèr) : tiss.liens64@gmail.com o 06 78 97 10 37
Tiss'liens 64 : www.tissliens64.com
Collectif çà-i : www.ca-i.org