Danças a Saut e lenga a Ortès
L'associacion Cultura de Noste qu'organiza un estagi de dança seguit d'un bal tradicionau dissabte lo 15 d'octobre a saut de Navalhas. Titolat "Creacion en davant", l'estagi que hica a l'aunor duas creacions navèras.
 

Après l'escaduda de las duas purmèras edicions deu son hestau Dancem, l'associacion Cultura de Noste qu'organiza un estagi de dança seguit d'un bal tradicionau dissabte lo 15 d'octobre a saut de Navalhas. Titolat "Creacion en davant", l'estagi que hica a l'aunor duas creacions navèras.

Au programa :

- a 14H30 : Estagi de dança dab Lo Congò de las hilhas de Bordèu, creat tau concors Campestral 2006, qu'ei hèra innovant pr'amor que partvira los còdes puish a que los rotles masculins e femenins e son arrepensats d’ua faiçon hèra modèrna, ancrada en lo noste XXIau sègle, e Lo pas galant, qui'ns torna en·hicar au contra en un monde de galanteria e d'arrespècte de l’aute, qu'ei ua dança hèra eleganta dab pas leugèrs, aerians, sorríders, reveréncias e potons, qui arrevitarà los amators deu Pas d’estiu.

- 19H : Repaish partatjat (aubèrga espanhòla)

- 21h : Bal dab Espartenhas au parat deu quau se poderà practicar las duas danças apresas.

Tarifas : Estagi + bal : 15€
               Bal unicament : 6€
Inscripcions a l'estagi abans lo 8 d'octobre, aperar lo 06 85 65 34 50 tà saber se demoran plaças.

Mes Cultura de Noste que persegueish tanben lo son cicle de conferéncias dab Crestian Lamaison qui anarà de cap tà l'istòria lo dimars 18 d'octobre a 20H a la Maison Gascoin d'Ortès. Coneishut peus sons dessenhs e publicacions, qu'a estudiat pendent annadas lo periòde qui aperam de la Gran Guèrra, en se plaçar au nivèu deus soldats, deus petits gradats. Qu'evocarà los peluts de noste, las mutinarias de 1917 e las repressions qui se'n seguín. Que s'atardarà sus l'aventura extraordinària de Vincenç Moulia, originari de las Lanas, qui condemnat e estar fusilhat, e's podó escapar e tornar tà Nassiet, lo son vilatge, puish tà Espanha après d'estar estat denonciat. Que's morí a l'atge de 96 ans e que s'enterrè a Ortès.

Informacions : www.culturadenoste.com