D'ua lenga a l'auta
Dab ua seria d'animacions en bilingua, Marie-Hélène Cauhapé que hè descobrir lo gascon aus mainats...
 

Ne’vs vam pas díser enqüèra tots los ben·hèits deu bilingüisme doriu en çò deus mainats. Que sabem hèra plan los mainats que son esponjas vertadèras. Totun, a maugrat d’ua volontat (vertadèra era tanben ?) de l’Educacion Nacionau d’avalorar l’ensenhament de las lengas regionaus, los pairs, ensenhaires e a còps los inspectors d’academias que semblan drin mei reticents a prepausar aqueth ensenhament o au mensh ua iniciacion.

Alavetz, quan la directora deu Hialat d’Assistantas Mairaus de Poei de Lescar e pren l’iniciativa de contactar ua contaira bearnesa tà aviar un projècte bilingüe francés / gascon qui haré enténer ua auta lenga aus petits, que prenem lo calam e que se’n hèm lo reclam.

Aqueste projècte aperat « D’ua lenga a l’auta » qu’estó aviat per Marie-Hélène Cauhapé en partenariat dab l’estructura d’arcuelh, e sostienut per la Comunautat de las Comunas deu Miei de Bearn. Que’s vira de cap taus mainats de mensh de tres ans (los mei petits qu’an tres mes), las lors assistantas mairaus e pairs e mairs de Poei, Artigalova e Usenh. Capvath ua seria d’animacions, que’s hè ua descobèrta de la lenga gascona dab cantas, jòcs de dits, danças, lecturas de libes, continas…

Començadas lo 3 de març passat, las animacions que’s seguiràn tot lo mes dinc au miei deu mes d’abriu, quan s’i debanarà un espectacle bilingüe qui tornarà préner los elements de las animacions de las setmanas passadas.
Marie-Hélène Cauhapé qu’ei acompanhada per la musiciana Véronique Nadeau.

Mei d’entresenhas : http://mariehelenecauhape.jimdo.com/