Clap de Lenga a Salias
Lo purmèr hestenau deu cinèma occitan que's debanarà en Bearn deu 9 dinc au 11 de mai...
 

Lo purmèr hestenau deu cinèma occitan que’s debanarà deu 9 dinc au 11 de mai a Salias.

Organizat per l’associacion Accents du Sud, Clap de Lenga que’vs perpausa 3 dias d’animacions a l’entorn deu cinèma e deus professionaus de l’audiovisuau occitans.

Projeccions, talhèrs escolars, concors de scenaris e encontres professionaus que son au programa : 

-       Difusion d’un vintenat de filmes de tota traca (ficcion, animacion, documentari, joen public…) e de tots formats (corts, mejans e longs metratges).

-      La sensibilizacion e la mediacion culturau taus escolars (projeccions de dessenhs animats en occitan, practica video en occitan, talhèr de cort-metratge…).

-        Ua masterclass ubèrta au public dab un realizator e lo pairin deu hestenau, Francis Fourcou.

-    La 2e édicion deus Encontres professionnaus de l’Audiovisuau e du Cinèma Occitans : partatges d’experiéncias e talhèrs de tribalh dab los diferents actors de la cordèra.

-        Aperitius-concèrts hestius e conviviaus qui brembaràn, solide, l’esperit de Hestiv’Òc.

Lo divés, après ua jornada dedicada aus escolars, l’obertura que’s harà dab un aperitiu-concèrt animat peus Joan-Francés Tisnèr e Jakes Aymonino abans la projeccion, en preséncia de Francis Fourcou, deu filme « Malaterra ».

Las matiadas que seràn consacradas au joen public dab las projeccions deus filmes d’animacion : « Lo Jorn de las Gralhas » lo dissabte e « Kerity » lo dimenge. Aqueths filmes que son estats sostitulats en francés taus pairs qui non comprenen pas l’occitan.

Tot au long deus dus dias que seràn difusats subretot « Gascogne », « Patrimòni », « Corrent en davant », « Les 4 saison d’Espigoule », « Eth vin de casa », « Adiu nadau » e « Farrebique ».

En dus mots : 2 salas de projeccions : Lo Cinèma Le Saleys e la sala Jean Monnet e 1 espaci d’arcuelh taus aperitius-concèrts e taus expausants : lo Pavillon Saleys.

3,50€ la projeccion e 8€ lo pass-jornada.

Tà véder lo programa sancer que podetz anar sus : http://www.hestivoc.com/cinema/programme

Entresenhas : Accents du Sud au 05 47 41 40 46.