Cantèra de sostien aus refugiats de Gelòs
Despuish lo mes d'octobre passat, le centre Beterette de Gelòs qu'arcuelh a quaranta refugiats. Miquèu Campgran-Dessus qu'a avut l'idea d'organizar ua serada cantèra qui serà lo parat de partatjar e d'escambiar dab eths a l'entorn de las cantas tradicionaus bearnesas, sodanesas, afganesas e iraquianas..
 

Despuish lo mes d'octobre passat, le centre Beterette de Gelòs qu'arcuelh a quaranta refugiats sodanés, afganés e iraquians. Benevòles que s'i hèn cada dia tà balhar drin de temps e d'ajuda tà favorizar la lor integracion au miei deus quaus Miquèu Campgran-Dessus, formator au CFPÒC, qui'us balha cors de francés. Pendent los sons cors, que'us a demandat de cantar cançons deus lors país. Eth medish amator de canta tradicionau qu'a avut l'idea d'organizar ua cantèra tà e dab los refugiats. La serada que serà lo parat de partatjar e d'escambiar dab eths a l'entorn de las cantas tradicionaus bearnesas, sodanesas, afganesas e iraquianas.
Que's debanarà doman ser, divés 27 de genèr, au centre Beterette a comptar de 8 òras e mieja.


Rendetz-ve doncas a tots los amators de canta qui an enveja d'anar a l'encontre d'aqueths òmis qui an tot quitat, familha e país a la risca de perir.
Que podetz portar còcas e de qué béver shens alcoòl a partatjar tots amassa.
Lo Centre qu’ei a 3 kms de la rocada sud qui passa a Gelòs en dirreccion de « la Vallée heureuse ».
L'associacion Isard-Cos qui s'aucupa de l'arcuelh deus refugiats que cèrca benevòles prèsts a balhar un còp de man, nat beson de competéncias particularas que i a servicis de tota traca a har.
Informacions : https://isard-cos.jimdo.com/contact-1/