Canta Se Gausas ! en Aussau
Tà la soa quatorzau edicion, Canta Se Gausas ! que torna en Bearn e en Vath d'Aussau...
 

Imaginat peu Bastien Miquèu, Canta se gausas ! que vòu tornar aus arraditz de la tradicion cantada deus país de montanha de Bearn e Bigòrra.
Lo concèpte de Canta se gausas ! que s'apita sus duas ideas originaus :
- lo tiratge au sòrt : los cantaires tirats au sòrt en tres categorias (hemnas, òmis e mixte) que son organisats per triòs. Cada triò qu'a 30mn tà har coneishença, causir e preparar ua canta, trobar ua version e cantar sus l'empont shens las paraulas. La canta que dèu estar gessida deu repertòri tradicionau pirenenc, en gascon o en francés, e a duas o tres votz segon.
- l'organisacion escenica que torna a préner la posicion naturau en aròu deus cantaires en situacion tradicionau de canta, dab lo public tot ad arron.

Tà la soa quatorzau edicion, la jòga vocau de Canta se gausas ! que torna en Bearn e aqueste còp en Vath d'Aussau.
Que's debanarà dissabte lo 16 de noveme au Casino de las Aigas Bonas.
A comptar de 19ò, Los de Laruntz que haràn un torn de canta au parat de la sortida deu lor darrèr CD. En seguir, l'aperitiu que serà adobat per la Calandreta Aussalesa e lo repaish peu restaurant L'Etape.

Entresenhas : www.cantasegausas.com e tà dromir : Ofici de Torisme 05 59 05 12 17