Calandreta que viverà !!!
La Federacion Departamentau de las Calandretas deus Pirenèus-Atlantics qu'apèra a manifestar...
 

Calandreta e viverà ? Devath aquesta question drin ahiscaire, que’s pausa un problèma vertadèr entà las escòlas immersivas en occitan.

Quauques setmanas a, la Prefectura deus Pirenèus Atlantics que contestè l’engatjament de las collectivitats territoriaus, en particular de la mairia d’Artix, auprès de las nostas escòlas associativas en emparà’s sus la Lei Falloux de 1850. En Bearn, la Calandreta d’Artics qu'ei la purmèra directament atacada.

Calandreta qu'ei vaduda mercés a l’iniciativa ciutadana. Uei, los 35 ans de tribalh d'aqueth gran movement de solidaritat e l'implicacion de las collectivitats territoriaus que son miaçats. E atau, totas las escòlas immersivas en lenga regionau deu noste departament que son pertocadas.

Entà deféner las escòlas immersivas en dangèr e contunhar la mission de servici public d'ensenhament, de transmission de la lenga e la cultura en associacion dab las collectivitats territoriaus, la Federacion Departamentau de las Calandretas deus Pirenèus-Atlantics qu’apèra a manifestar a Pau, lo dissabte 15 de març, a partir de 15h au despart de la Plaça de la Liberacion.

Ua grana serada hestiva qu'ei prevista arron la manifestacion, plaça deu Heralh, dab un vresperon e animacions a gratis entaus mainats, e tanben de qué minjar, un estanquet e un empont ubèrt dab grops qui sostienen Calandreta (Los Pagalhós, Balaguèra, Lambrusquèra, Tots au Lées, Croc'Stana, Los Seuvetons, Diubiband,...).

A notar, l'organizacion de bus entà arribar dinc a Pau. Dus camins: Perigüers – Pessac – Langon - Pau o Tolosa – Murèth – Tarba – Pau. Mei d'entresenhas e buletin d'inscripcion en clicar ací.

 Que podetz tanben muishar lo vòste sostien en signar la peticion en linha.